Paano ang Pasko sa mga Bulag?

Paano ang Pasko sa mga Bulag?
by Lyza

Gabi na kung ako'y umuwi mula sa trabaho

At dahan-dahang tumawid patungong Meralco

Nakatayo at buong pasensya ako nagiintay ng taxi

Gusto ko na makauwi at madilim na kasi.

Sa pagsakay ko ng taxi ay patuloy ang pagintay

Sa sobrang traffic, ang isip ko ay naglakbay

Mga magagandang ilaw, mga ngiti at mga makukulay na regalo

malapit na nga ba ang Pasko?

Napatigil ako sa aking pagmumuni-muni

nang may kumatok sa bintana kong katabi

kumakatok at namamalimos na babae

sa aking pagsusuri'y, bulag ang ale.

Umandar na ang taxi at wala akong nai-abot

pero sa aking isip ay hindi ko malimot

Paano ang pasko sa bulag?

Hindi ba parang ang daming kulang?

Buti pa ang bingi

Nakikita ang lahat ng ilaw at ngiti.

Kahit hindi makarinig,

Nakikitang siyang kasali pa rin.

Buti pa ang pipi

Naririnig ang masasayang awitin

Kahit hindi makasabay sa jamming,

Nakakasabay naman ang kanyang mga ngiti.

Ngunit paano ang bulag?

Parang malaki ang kulang.

Mga magagandang ilaw, makukulay na regalo at mga ngiti

kahit sa isip ay hindi mawari.

Mahirap kung iisipin

na ang natitirang pandamdam at pandinig

ay natatanging sandalan sa paligid

na puno ng kanto at gilid

Malapit na ang Pasko

ngunit ang mga bulag ay paano?

Magkakaroon pa kaya ng pagkakataon

na maranasan nila ito ng buo?

Ano kaya ang pwedeng gawin

para sa mga bulag nating kapatid?

Regalo, pagkain o pera

lahat ay parang sadyang kulang pa.

Sa wari ko'y dapat nating gawin

para Pasko'y padamahin

pagmamahalan at kaligayahan

natatanging sagutin

Sila ay mga nilalang din

na Pasko ay ninanais din

kahit wala silang makita

Pasko ay sana madama

Maswerte ang walang kapansanan

at lahat ng pwede ay nararanasan

ngunit hindi lahat ay mabuti

para mga natatamasa ay ibahagi

Sana ay maisip ng lahat

na lahat materyal na bagay ay hindi sapat

Pasko'y hindi lamang para sa walang idinadaing

ngunit para sa lahat ng tao rin.

Minsan aking naisip

mas mabuting bulag sa mata ngunit dilat sa isip

Sapat na sila sa anong meron

at hindi na nagagawang magreklamo

Buti pa ang mga bulag

Tunay na kahulugan ng Pasko'y alam

Kahit hindi nakikita ang paligid at mga kulay

sila'y tunay na nagpapasalamat sa buhay

Huminto na ang sinasakyan ko

Ay, nasa bahay na pala ako.

Ano na kaya nangyari sa bulag na babeng nakita ko?

Malapit na nga ba ang Pasko?